فى الفترة الأخيرة ظهرت مجموعة مجلات الكترونية بصورة كبيرة قوى لكن مش كل المجلات دى بتكون فعلا كويسة وكمان مش كلها بتعبر عننا أو عن الشباب وعن الحياه اللى كل الناس عايشاها
لكن ساعات بنلاقى فعلا مجلات شبابية جدا وبتعبر عن الشباب بصورة كبيرة ومهتمة جدا بتقديم حاجة موجودة بالفعل فى واقعنا
كافيانو مجلة جديدة ظهرت مؤخرا على ساحة المجلات الألكترونية
فى البداية لما شفت أعلان المجلة واللوجو بتاعها حسيت أنى هلاقى فعلا حاجة جديدة ومختلفة وكمان لما عرفت أن سن أعضاء المجلة صغير
ولكن كنت مستنية لما المجلة تنزل علشان أقدر أحدد وبالفعل نزلت المجلة وأنبهرت جدا بكل حاجة فيها المجلة عموما مبهرة جدا ورائعة وبتعبر فعلا عن الشباب وأقسامها شاملة كل حاجة ممكن تخطر على بالك وكمان طريقة عرض المواضيع جديدة وحلوة قوى
بس أيه كافيانو ولية ومين هما تيجوا نقرب منهم شوية أكتر ونعرف هما مين
معانا أحمد الساعاتى رئيس تحرير المجلة
فى البداية عايزين نعرف فكرة المجلة جت منين ولية أسم كافيانو تحديدا؟
بس أيه كافيانو ولية ومين هما تيجوا نقرب منهم شوية أكتر ونعرف هما مين
معانا أحمد الساعاتى رئيس تحرير المجلة
فى البداية عايزين نعرف فكرة المجلة جت منين ولية أسم كافيانو تحديدا؟
اولا احنا كنا بنفكر فى فكرة ويب سايت نعمله وفى نفس الوقت دا كنا بنكتب عادى هواية واحنا بنفذ الويب اللى فكرنا فيه لاقينا جوجل عملته بس فى امريكا قولنا نكمل لاقينا شركة تانية عربية عملته هنا واضربت الفكرة بس كنا عايزين نعمل ويب سايت برضة ففكرنا اننا نعمل مجلة بتتكلم عننا ونثبت فيها نفسنا
اما بقى كافيانو دا بمعنى كافى او قهوة يعنى اللى هيقعد عندنا هيلاقى اللى هو عايزة وفى نفس الوقت هيلاقيها بطريقة جديدة ومفيدة
رئيس تحرير المجلة شاب عنده 17 سنه وباقى الأعضاء سنهم صغير ممكن تعرفونا أكتر على نفسكم ؟
بدر شعيب 17 سنة اولى معهد تعاون ((المصمم))
عبدالله محمد 17 سنة اولى معهد الجزيرة العالى ((كاتب))
ريهام 19 سنة ثالثة كلية فنون جميلة ((الديكور))
احمد زين 17 سنة اولى معهد تعاون((محرر الفن))
مروة17 سنة اولى كلية تجارة عين شمس ((بنات كافيانو))
خالد على عبد القادر17 سنة اولى كلية اداب القاهرة((محرر وكاتب))
خلود المصري17 سنة اولى كلية تجارة عين شمس ((مساعدة التحرير))
رحمة المدنى17 سنة اولى معهد خدمة اجتماعية ((اشعار كافيانو))
زينب مصطفى الساعاتى 22 سنة بكليريوس اعلام القاهرة ((مرجعة لغوية))
احمد مصطفي الساعاتي 17 سنة اولى معهد خدمة اجتماعية ((رئيس التحرير))
دول اللى اكيد معانا ممكن ناس تانية تبقى معانا الفترة اللى جاية ان شاء الله
هل أصابتكم حالة خوف من فشل التجربة دى ؟
اوووووووووووه طبعاااااااا ومزال فى خوف
وأزاى قدرتوا تتخطوا كل خوف أو قلق من فشل التجربة ؟
الحمدلله احنا واتقين من ان كل نجاح لازم يجى قبله قلق وكمان مؤمنين برسالتنا اوى علشان عارفين ان هدفها مهم بجد مش بنفرغ طاقتنا وبنقضى هوايتنا وخلاص لا لينا هدف من وراه وهو اننا نظبط دماغ الشباب اللى فى الفترة اللى فاتت دى كتير اوى بقوا يهتموا بحاجات كتير اوى تافهه وملهاش معنى وكمان سيطرت علينا فكرة تقليد الغرب اوى احنا بقى قولنا ليه مش هما الى يقلدونا نخلى الشباب هادف الاول بعد كدة هيبقى ناجح ونبهر الغرب بينا ونقولهم احنا موجودين برضة بشخصيتنا المستقلة لوحدها فقولنا نبقى الحياة عادى خالص فى المجلة واسلوبنا هو اسلوب الشباب بس بطريقة مفيدة علشان ميزهقوش مننا وفى نفس الوقت ميبقوش بيضيعوا وقت على الفاضى وخلاص بس مش اكتر ويارب يوفقنا فى تحقيق هدفنا دا
أيه الخطوات والحاجات اللى عملتوها علشان توصلوا للنتيجة دى وهل كل واحد منكم أهله شاركوة فى التفكير فى المجلة ولا دى كانت حاجة خاصة بيكم أنتم بعيدا عن الأهل ؟
فى الاول بعد ما اتفقنا اننا نعمل المجلة وجبنا فريق العمل وقسمنا شغلنا وتوكلنا على ربنا بالنسبة لاهلنا كانت الفكرة فى الاول طقة فى دماغنا ومش فارقة معانا اهلنا اوى عرفوا زى ما معرفوش مش هتفرق كتير وهما كانوا حاسين اننا بنعمل حاجة كويسة وخلاص بدل مانضيع وقت فى حاجات فاضية بس بعد كدة لما العملية وسعت مننا واحتاجنا لخبرة معانا بقوا يشاركونا جاااامد اوى كمان
فيه حد منكم كان عنده مشاكل فى بيته بسبب المجلة دى ولا الأهل كانوا متفهمين لها ؟
اه وبرضة مازالت المشاكل دى بسبب ان فى ناس فينا مش كلنا المجلة كلت دماغة خالص ومش مركز فى الدراسة خالص وانا واحد منهم
بعد ظهور أول عدد ليكم وأنطلاقكم ونجاحكم الكبير أيه شعوركم ؟
هو الحمدلله طبعا دا توفيق ربنا واحنا لحد دلوقتى مش معتبرين نفسنا نجحنا انما لما نأثر فى الناس بجد مش مجرد شايفن ان كافيانو مجلة حلوة ودماغ اللى شغالين فيها حلوة وخلاص يبقى احنا كدة منجحناش وعملنا زى وسائل اعلام كتير قبلنا ويمكن احسن مننا انما هدفنا ان كلامنا يوصل للدماغ عالطول ويأثر فيه علشان نوصل للى احنا عايزينه
أنتوا عملتوا جروب فى الفيس بوك عن المجلة والجروب فعلا معروف وفيه تجاوب فيه أزاى فكرتوا فى فكرة الفيس بوك اللى أعتقد أنها كانت سبب من أسباب شهرة كافيانو ؟
فى الاول كدة بس احب ادعى ربنا واقول ربنا يخليلنا الفيس بوك دا لانه اختراع عبقرى وجاتلنا الفكرة منه علشان احنا اصلا كنا بنتعامل عليه عادى ولاقينا فية الناس اللى ممكن تتقبل رسالتنا وكمان الفيس بوك فيه ملايين يعنى يعتبر زى ميدان رمسيس كدة عايزة تروحى اى حتة فى العالم منه وعايزة توصلى لاى حد برضة منه فقررنا نعمل جروب لينا على الفيس بوك علشان كمان نطرح فيه مواضيع ونتناقش مع الناس فيها والناس تقول رأيها فينا ويبقى فى مساحة مشتركة بينا وبين الشباب اللى احنا عاملين المجلة علشانهم
